第一次見面，先同大家介紹下，鋒主義由今個星期開始會不定期分享一系列簡單裝修教學 “工程一分鐘”，會由小弟謝夫主持。
內容主要會分做兩部分，第一部分會涉及較多理論或者關於概念既資訊。 第二部分會同大家講解一啲唔同種類既工程小知識。如果大家有咩唔明想知想問，可以 INBOX或者 E-MAIL 比小弟，小弟會盡量安排寫番相關主題，廢話講住咁多，即刻開始第一集~~
我地由淺入深，首先講下全屋基本程序，風火水電木器油漆，到底應該做咩先呢？
基本程序係: 清拆–>水電–>泥水–>木器–> 油漆
當然呢五樣野係未包括晒所有野係入面，但已經包括所有大項。不過呢個程序並唔係絕對，好多時候會因為實際情況而改變。例如，有的位置係必須先做好油漆再做木器。好似燈槽內側，因為安裝後，手伸唔到入去做油漆，但又會見光，就一定要掉轉次序，或者係兩者同時做。所以如果見到工程次序有出入，唔好即時當師傅做錯野，可以直接問下負責人，相信佢會好清楚咁解答你，如果佢答唔出，咁就真係可能有問題喇。
工程小知識
大熱天時，個個都開冷氣，亦都係冷氣機最易出問題既時候。今次講下分體機風咀滴水問題。有唔小人試過部機用左幾年之後，係出風位會滴水滴到水舞間咁，到底點解會咁呢？其實出現呢個情況好大機會係去水喉塞左，去水喉塞有兩個可能：第一係由冷氣機去水喉接駁到大廈主喉之間塞左。依種情況其實好易解決，一枝鏍絲批，一條細膠喉或者係飲管，再加你把口就搞掂。首先拆開冷氣機外殼，係凍COIL 下面有個水盆，水盆左或右會有個去水位，插條喉入去用力一吹，就可以通番佢。
第二個情況係大廈主喉塞左。但因為涉及公共地方，再加上大廈主喉係屬於公物，所以依個情況自己就好難解決，要先直接聯絡大廈管理處，等對方安排喇。
不過無論如何，都可以試試第一個方法先，真係唔得的話，先通知管理處都唔遲。
